काँग्रेस आफ्नै दममा चुनाव जित्ने हैसियत राख्छ : प्रदेश सभा सदस्य विष्ट
पुनर्वास । काँग्रेस अरूका भरमा नभई आफ्नै दममा चुनाव जित्ने हैसियत राख्ने कुरा नेपाली काँग्रेस कञ्चनपुरका नेता संविधानसभा सदस्य एवं सुदूरपश्चिम प्रदेश सभा सदस्य दिवान सिंह विष्टले बताएका छन् ।
नेपाली काँग्रेस कञ्चनपुर निर्वाचन क्षेत्र नम्बर १ को ‘क’ प्रदेश कार्यसमितिले पुनर्वासमा आयोजना गरेको कार्यक्रममा बोल्दै नेता विष्टले सो कुरा बताएका हुन् ।‘अर्काको वैशाखी टेकेर काँग्रेस हिँड्न हुँदैन,’ उनले भने, ‘काँग्रेसका नेता कार्यकर्ताहरूले जनताको मन जित्ने गरी काम गर्नु पर्दछ। आ–आफ्ना कमी कमजोरीहरूलाई सबैले सच्याए मात्रै काङ्ग्रेस यस क्षेत्रमा बलियो देखिन्छ ।’
त्यस्तै कार्यक्रममा बोल्दै अधिकांश नेतागणहरूले अहिले पार्टीमा पदका लागि तँछाडमछाड गर्नेहरू नै पार्टीमा निष्क्रिय र विरोध गर्दै हिँडिरहेको बताएका थिए । उनीहरूले जबसम्म आफ्नो नेतृत्वगणहरलाई मान्दैनौ तबसम्म पार्टीमा एकता र सङ्गठन कमजोर हुने कुरा व्यक्त गरेका थिए ।
नेपाली काँग्रेस प्रदेश १‘क’ को कार्यसमितिका सभापति मानबहादुर रोकायाको सभापतित्व तथा संविधानसभा सदस्य एवं सुदूरपश्चिम प्रदेश सभा सदस्य दिवान सिंह विष्टको प्रमुख आतिथ्यमा सम्पन्न भेलामा सो क्षेत्रका क्षेत्रीय सभापति गोपीप्रसाद उपाध्याय,प्रदेश सभा सदस्य दाउत तामाङ, महाधिवेशन प्रतिनिधि तोयप्रसाद शर्मा लगायतकाको सहभागीता रहेको थियो ।
