कञ्चनपुरको पुनर्वासमा माघ २२ गतेबाट फागुन ३ गतेसम्म महोत्सव हुने
पुनर्वास– उत्पादन र कला संस्कृतिलाई प्राथमिकता दिँदै कञ्चनपुरको पुनर्वासमा उद्योग वाणिज्य सङ्घ पुनर्वासको आयोजनामा महोत्सव हुन लागेको छ।
सोमबार उद्योग वाणिज्य सङ्घ पुनर्वासले पत्रकार सम्मेलनको आयोजना गर्दै माघ २२ गतेदेखि फागुन ३ गतेसम्म महोत्सव सञ्चालन सम्बन्धी र उद्देश्यबारे सार्वजनिक गरेको हो।
महोत्सव पुनर्वास नगरपालिका ३ र ५ सँग जोडिएको राष्ट्रिय आवास कम्पनीको नाममा रहेको ६५ बिघा जमिनमा आयोजना हुने जनाइएको हो।
महोत्सवमा विभिन्न कृषि उत्पादन, होटल व्यवसाय, घरेलु उद्योग व्यवसाय लगायतका थुप्रै स्टलहरू रहनेछन् । महोत्सव सञ्चालनले पुनर्वास क्षेत्रको आर्थिक समृद्धिसँगै पर्यटन प्रवर्धनमा समेत टेवा पुग्ने आयोजकको विश्वास छ ।
महोत्सवलाई सभ्य र भव्य रूपमा सम्पन्न बनाउन विभिन्न उपसमितिहरू निर्माण गरि थप व्यवस्थित बनाइने उद्योग वाणिज्य सङ्घका अध्यक्ष राजकुमार रायमाझीले जानकारी दिए।
अध्यक्ष रायमाझीका अनुसार स्थानीय कला संस्कृतिको जगेर्ना र स्थानीय उत्पादनलाई विशेष जोड दिइ आगामी वर्षहरूमा पनि महोत्सवलाई निरन्तरता दिने बताए ।
