आई.बी.आर.डी.बजारका चल्ने दुई सोलार कामै नलाग्ने गरि पैसट्ठी बिघामा बेवारिसे
पुनर्वास-कंचनपुरको पुनर्वास नगरपालिका-३, आई.बी.आर.डी. बजारको अटो चोक नजिकै सडकमा रहेका दुई सोलार बत्ती बेवारिसे अवस्थामा देखिएका छन् ।
करिब तीन हप्ता बढी समय हुँदा सम्म पनि बजार नजिकै पैसट्ठी बिघा क्षेत्रमा बेवारिसे अवस्थामा सोलार बत्ती फालिएका छन् ।
सोलार बत्ती बेवारिसे अवस्थामा फालिएको विषयमा पुनर्वास नगरपालिका-३ का प्राविधिक लालमन तामाङसंग बुझ्दा टेक्निसियनलाई जडानका लागि बारम्बार बोलाउदा पनि नआएका कारण अलपत्र जस्तो भएको जानकारी दिए ।
“अब एक दुई दिनमै जडान हुन्छ । अन्य टेक्निसियनले जडान गर्न नसक्ने र सोलार सम्बन्धि टेक्स्निसियनले मात्रै जडान गर्न सक्ने भएका कारण समस्या हुन पुगेको हो ।” उनले भने, “बेवारिसे फालेका हैनौ । तत्कालै नजिकै जडान गर्नुपर्ने भएकाले पैसट्ठी बिघामा राखेका हौं ।”
तर कालिका बजार समितिका सदस्य राजेन्द्र पौडेलले सडक निर्माण अवधीमा निकालिएपछी सोलार बत्ती अलि सुरक्षित साथ व्यवस्थित तरिकाले राखिनुपर्ने बताए ।
हेर्दा बेवारिसे अवस्थामा जस्तो सोलार बत्ती सहितको पोल फ्याकिएको छ । सरकारी काम भएका कारण पनि मतलब नभएको हुन सक्ने उनको भनाई छ ।
पुनर्वास नगरपालिकाको यो सोलार बत्ति त एक उदाहरण मात्रै हो । हरेक योजनामा यस्ता अनेकौं समस्या छन् तर समाधान तर्फ भने जनप्रतिनिधि र कर्मचारी मुकदर्शक देखिन्छन् ।
