देउवासँग भेटबारे ओलीले भने- त्यसको अर्थपूर्ण छलफल
बिहीबार सम्पादकहरूसँग अन्तरक्रिया कार्यक्रममा अध्यक्ष ओलीले देउवासँग देश, समय र परिस्थितिका विषयमा अर्थपूर्ण कुराकानी भएको बताएका हुन्।
‘अर्थपूर्ण छलफल भयो। त्यसको अर्थ छ। भोलि देखिन्छ,’ उनले भने। मंसिर १९ गते ओलीले महाराजगन्जस्थित निवासमै पुगेर कांग्रेस सभापति देउवासँग भेटवार्ता गरेका थिए।
‘दुई प्रमुख दलका शीर्ष नेताले भेटवार्ता गर्दा देशको बारेमा कुरा गरेनन् होला? देशको चिन्ता गरेनन् होला? नागपञ्चमीमा टाँसे जसरी गोबरले टाँसिदिएको यो सरकारको बारेमा कुरा गरेनन् होला?,’ ओलीले बिहीबार सम्पादकहरूसँग भने।
‘रेस्क्यू किन गरेको? किन बचाउनुपर्यो भन्ने कुरा कति शान्तिप्रीय, कति मानवअधिकारवादी, कति जिम्मेवारीपन रहेछ भन्ने कुरा त प्रष्टै देखिएको छ। अनि यस्तो व्यक्ति प्रधानमन्त्री भएको विषयमा कुरा हुँदैन?,’ ओलीले थपे। ओलीले देशको समसामयिक विषयबारे छलफल र त्यसको समाधानका विषयमा छलफल भएको बताए। ‘समाधानको बाटोमा चुनौतीहरू के हुन सक्छन्? कसरी गर्ने भन्ने विषयमा छलफल हुनु स्वाभाविक हो,’ उनले भने।
