धनगढीमा सयौं प्रहरीकै अगाडि युवा संघबाट जेन्जी युवा कुटिए
धनगढीमा – धनगढीमा युवा संघका कार्यकर्ताले जेन्जी युवाहरूमाथी कुटपिट गरेका छन्। धनगढी कभर्डहल अगाडि शान्तिपूर्ण प्रदर्शन गरिरहेका करिब दुई दर्जन जेन्जीहरूलाई युवा संघका सयौं कार्यकर्ताले आक्रमण गरेका हुन्।
एमाले नेता महेश बस्नेतको बिरोधमा सडकमा प्लेकार्ड समातेर शान्तिपूर्ण प्रदर्शनमा रहेका जेन्जीहरूलाई मोटरसाइकलमा आएका युवा संघका युवाहरू प्रहरीकै अगाडि कुटपिट गरेका हुन्। कुटपिटमा धनगढी-४ की जेन्जी लिडर सरिता जोशीको हात भाँचिएको भनिएको छ। जोशीको हातमा चोट लागेपछि उनलाई नजिकै रहेको निसर्ग अस्पतालमा लगिएको छ। आक्रमणमा परेर गोपाल बोहरा लगायतका युवाहरूलाई पनि सामान्य चोटपटक लागेको जेन्जी प्रदर्शनकारीले बताएका छन्।
जेन्जीहरूले प्रहरीले आफ्नो सुरक्षा नगरेको आरोप लगाएका छन्। उनीहरूले युवा संघका केटाहरूलाई आफूहरूमाथी आक्रमण गर्न दिएको आरोप लगाएका छन्। सम्भावित झडपलाई मध्यनजर गरेर कभर्डहल अगाडि सयौंको संख्यामा नेपाल प्रहरी र सशस्त्र प्रहरी तैनाथ गरिएको थियो।
तर उनीहरूले युवा संघका युवाहरूलाई रोक्न नसकेको कुटपिटमा परेका जेन्जीहरूले बताएका छन्। सयौं प्रहरीको सुरक्षा घेरामा रहेका जेन्जी युवाहरूले युवा संघबाट कुटाइ खाने अवस्था निर्माण कसरी भयो भन्ने विषयमा प्रतिक्रिया माग्न कैलाली प्रहरी प्रमुख नरेन्द्र चन्द र प्रवक्ता राजकुमार सिंहलाई सम्पर्क गर्दा दुबै जना प्रहरी अधिकारीको फोन उठेन।
