सुदूरपश्चिमका मतदान केन्द्रमा १५ हजार ३९३ कर्मचारी खटाइने
अत्तरिया- सुदूरपश्चिमका २ हजार १९९ मतदान केन्द्रमा १५ हजार ३९३ कर्मचारी खटाइने भएको छ।
फागुन २१ गते हुने प्रतिनिधिसभा सदस्यको निर्वाचन गराउन प्रत्येक केन्द्रमा ७ जना सम्म खटाउने गरी उक्त सङ्ख्यामा कर्मचारी खटाइने भएका हुन।
प्रदेश निर्वाचन कार्यालय कैलालीका अनुसार मतदान केन्द्रमा निर्वाचन गराउन सङ्घ, प्रदेश र पालिका तहका कर्मचारी, सरकारी स्वामित्वका कार्यालय, बैङ्क तथा वित्तीय संस्थाका कर्मचारी खटाइने छ। कार्यालय प्रमुख प्रेमराज भट्टले प्रत्येक मतदान केन्द्रमा एक निर्वाचन अधिकृत, एक सहायक निर्वाचन अधिकृत, एक सहायक कर्मचारी र स्वयंसेवक गरी सात जनासम्म खटाउने गरी व्यवस्थापन भइरहेको र अपुग भएमा शिक्षकलाई पनि खटाउने तयारी रहेको बताए।
जिल्लागत रूपमा ५ निर्वाचन क्षेत्र रहेको कैलालीमा ४ हजार ४८७, ३ निर्वाचन क्षेत्र रहेको कञ्चनपुरमा २ हजार ५२० र २ निर्वाचन क्षेत्र रहेको अछाममा १ हजार४९१ कर्मचारी परिचालन गरिने छ । यस्तै एक निर्वाचन क्षेत्र रहेको डोटीमा १ हजार २६०, दार्चुलामा १ हजार एक, डडेलधुरामा ९ सय ८७, बाजुरामा ८ सय २६, बझाङमा १ हजार ३२३ र बैतडीमा १ हजार ४९८ कर्मचारी खटाउन लागिएको छ। प्रदेशका सबै ९ जिल्लामा गरी १ हजार १७६ मतदान स्थल र २ हजार १९९ मतदान केन्द्रको व्यवस्था गर्न लागिएको छ।
प्रदेशमा ८ लाख ६४ हजार ४२३ महिला र ८ लाख ५२ हजार २१९ पुरुष समेत गरेर कूल १७ लाख १६ हजार ६६० मतदाता छन्। पछिल्लो समय गरिएको मतदाता नामावली सङ्कलनका क्रममा ४६ हजार २० मतदाता थपिएका थिए।
