दौडिरहेका ७ घोडाको पेन्टिङ : वास्तुअनुसार अर्थ के, कहाँ राख्नु राम्रो ?
धेरै घर तथा अफिसका भित्ताहरूमा दौडिरहेका सेता सात घोडाहरूको पेन्टिङ राखेको देख्न सकिन्छ । झट्ट हेर्दा यो सजावटका लागि मात्रै राखेजस्तो देखिए पनि वास्तुअनुसार त्यो पेन्टिङ राख्नुका विभिन्न अर्थ छन् ।
आखिर किन राखिन्छ त दौडिरहेका सात वटा घोडाको तस्बिर ? कुन दिशामा दौडिरहेका घोडाको तस्बिर राख्दा के फाइदा हुन्छ ?दौडिएको घोडा सफलता, प्रगति र शक्तिको प्रतीक हो । विशेष गरी सात घोडालाई व्यापार प्रगतिको सूचक मानिन्छ । त्यस्ता चित्रलाई आफ्नो घर, पसल तथा कार्यालयमा राख्दा व्यक्तिमा साहस, बुद्धि–धैर्यता, बुद्धि, अध्यात्म, प्रेम–आनन्द, ज्ञान, पवित्रता आदि गुणहरू प्रवेश गरी जीवनको हरेक क्षेत्रमा सफलता प्राप्त हुने जनविश्वास रहेको छ ।
वास्तु शास्त्रमा ७ घोडाको पेन्टिङको महत्त्व
गति : घोडाहरूको तीव्र गति तिनीहरूको विशेष पहिचान हो । आजभोलिको व्यस्त जीवनशैलीमा गतिको महत्त्व झनै बढेको छ ।
आर्थिक समृद्धि : घोडा धन र समृद्धिको प्रतीक पनि हो । घरको विशेष स्थानमा घोडाको मूर्ति वा चित्र राख्नाले धन र समृद्धि प्राप्त हुने बास्तु शास्त्रले बताएको छ ।
सकारात्मक ऊर्जा : घर वा कार्यालयमा घोडाको प्रतीक राख्नाले सकारात्मक र जीवन्त ऊर्जा ल्याउँछ, जसले वातावरणलाई रमाइलो र सकारात्मक बनाउँछ ।
प्रगति र सफलता : वास्तुका अनुसार सात वटा दौडिएको घोडाको पेन्टिङलाई प्रगति र उपलब्धिको प्रतीक मानिन्छ । यसले करिअर, व्यापार र जीवनका अन्य पक्षहरूमा द्रुत प्रगतिलाई सङ्केत गर्छ ।
अग्नि तत्त्व : पृथ्वी, आकाश, अग्नि, जल र वायु पाँच तत्त्व मध्ये घोडाहरूले अग्नि तत्त्वलाई प्रतिनिधित्व गर्दछ, जुन प्रसिद्धि, प्रेरणा र जोससँग सम्बन्धित छ ।
सुरक्षा : घोडालाई सुरक्षाको प्रतीक पनि मानिन्छ । जसले नकारात्मक ऊर्जा हटाएर सुरक्षित वातावरण सिर्जना गर्न मद्दत गर्दछ ।
सन्तुलन : घोडालाई शारीरिक र मानसिक सन्तुलनको प्रतीक मानिन्छ । जसलाई घर र कार्यालयमा राख्दा जीवनमा सन्तुलन कायम हुन्छ ।
वास्तु अनुसार पेन्टिङलाई यस्ता ठाउँमा राख्नु राम्रो
बैठक कोठा : साधरणतया बैठक कोठामा सात वटा घोडाको पेन्टिङ टाँग्नु शुभ मानिन्छ । यसलाई खुला फ्लोर भएको घरको डाइनिङ एरियामा पनि राख्न सकिन्छ ।
कार्यालय क्षेत्र : कार्यालयको रिसेप्सन क्षेत्रमा सात वटा दौडिरहेको घोडाको पेन्टिङ राख्नु शुभ मानिन्छ । यसले सकारात्मक ऊर्जा आकर्षित गर्न मद्दत गर्छ।
करिअरका लागि : राम्रो करिअरको लागि घरको पूर्व दिशामा सात वटा दौडिरहेको घोडाको पेन्टिङ राख्नुपर्छ । सूर्योदयको साथ सात घोडाहरूको पेन्टिङले नयाँ अवसर र करिअरमा प्रगतिलाई समेत सङ्केत गर्छ।
आर्थिक समृद्धिका लागि : उत्तर दिशा धनको देवता कुबेरसँग सम्बन्धित मानिन्छ । काममा सफलता र कीर्ति प्राप्त गर्न दक्षिणको भित्तामा उत्तर फर्किने गरी सात घोडाको पेन्टिङ लगाउनु शुभ मानिन्छ । समुद्रको छेउमा दौडने घोडाहरूको चित्रले आर्थिक स्थायित्व ल्याउन मद्दत गर्छ।
सम्बन्धमा सद्भाव कायम राख्न : सम्बन्धमा सद्भाव र सकारात्मकता कायम राख्न बैठक कोठाको उत्तरी भित्तामा सात घोडाको पेन्टिङ राख्नुपर्छ । यसलाई घरको साझा स्थानमा पनि राख्न सकिन्छ, जसले जीवनमा बाधाहरू कम गर्छ र परिवारमा शान्ति कायम गर्छ ।
यी ठाउँमा राख्नु हुँदैन
सुत्ने कोठा : वास्तुका अनुसार सुत्ने कोठाको भित्तामा घोडाको पेन्टिङ टाँस्दा निद्राको समस्या, दुर्भाग्य र नकारात्मक ऊर्जा आउन सक्छ ।
बाथरुम : यो पेन्टिङ बाथरुममा वा वाशरूमको भित्तामा राख्नु हुँदैन किनभने यो ठाउँ नकारात्मक ऊर्जाको स्रोत हो ।
पूजा कोठा : पूजा कोठामा देवी–देवताको मूर्ति वा पेन्टिङ मात्र हुनुपर्छ । यहाँ सात वटा घोडाको पेन्टिङ गर्नुहुँदैन किनकि यसले शक्तिशाली ऊर्जालाई आकर्षित गर्छ, जबकि पूजा कक्ष शान्त ऊर्जासँग सम्बन्धित छ।
अध्ययन कक्ष : वास्तुका अनुसार अध्ययन कक्षमा सात वटा घोडाको पेन्टिङ राख्नाले एकाग्रतामा बाधा पुग्न सक्छ । त्यसैले अध्ययन कक्षमा पनि यस्तो पेन्टिङ राख्नु हुँदैन ।
मुख्य ढोकाको विपरीत : घरको मुख्य ढोकाको विपरीत भित्तामा सात घोडाको पेन्टिङ राख्नु हुँदैन । यसले ऊर्जा प्रवाहमा बाधा पुग्न सक्छ र सकारात्मक ऊर्जा घरबाट बाहिर जान सक्छ ।
