
बेलौरीको बैशाखीबाट ट्याक्टरसहित दुई ट्राली भारतीय उखु नियन्त्रण
पुनर्वास–भारतबाट नेपाल भित्र्याइदै गरेको ट्याक्टरसहित दुई ट्राली उखु कञ्चनपुरको बेलौरीबाट प्रहरीले नियन्त्रणमा लिएको छ ।
बुधवार राती करिब १० बजेतिर बेलौरी नगरपालिका–१, बैशाखीको सीमा क्षेत्रबाट भे.१त. ३२८६ नम्बरको ट्याक्टरसहित दुई ट्राली उखु नियन्त्रणमा लिएको ईलाका प्रहरी कार्यालय बेलौरीका प्रहरी निरिक्षक गौरी प्रसाद जैशीले जानकारी दिए ।
प्रहरी निरिक्षक जैशीले बेलौरी प्रहरी र प्रदेश प्रहरी कार्यालयबाट सादा पोसाकमा खटिएको प्रहरी टोलीको संयुक्त प्रयासमा दुई ट्राली उखु नियन्त्रणमा लिएपनि चालक भने प्रहरी देख्दा भागेको बताए ।
नियन्त्रणमा लिएको ट्याक्टरसहितको उखु आवश्यक प्रक्रियाका लागि त्रिनगर भन्सार कार्यालय कैलालीमा पठाउने तयारी भईरहेको छ । भने यस अघि पनि बेलौरी प्रहरीले चालक सहित १ ट्राली उखु नियन्त्रणमा लिई भन्सार कार्यालय पुर्याएको थियो ।
त्यस्तै, भारतबाट उखु भित्रिँदा एकातिर सरकारको राजश्व चुहावट भईरहेको छ । भने अर्कोतर्फ सरकारले किसानका लागि दिने अनुदान रकममा समेत यसरी खुल्ला सीमाबाट भारतीय उखु भित्रिँदा बिचौलीयाहरुले नेपाली उत्पादन देखाएर अनुदान खाईरहेको देखिन्छ ।
स्थानीय एक व्यक्तिले बेलौरीको महाकाली मिलका लागि टेडुवा,भुडा लगायतका क्षेत्रबाट धेरै मात्रामा भित्रिने उखु प्रहरीले नियन्त्रण गरेपनि अहिले बैशाखी क्षेत्रबाट महाकाली सुगर मिलका लागि उखु जाने गरेको जानकारी दिए ।
सो क्षेत्र प्रहरीहरुको निगरानीबाट टाढा रहेकाले बिचौलियाहरुले बैशाखी नाकाको प्रयोग गरी उखु ल्याउने गरेको स्थानीयहरुबाट बुझिन्छ ।