
शिवशक्ति दुग्ध सहकारीद्वारा कृषकलाई प्रतिलिटर एक रुपैयाँ अनुदान
पुनर्वास- कंचनपुरको पुनर्वास नगरपालिका-८ स्थित शिवशक्ति दुग्ध सहकारी संस्था लिमिटेडले कृषकलाई प्रतिलिटर एक रुपैयाँ अनुदान रकम वितरण गरेको छ ।
शनिबार पुनर्वास नगरपालिकाका नगर प्रमुख तोय प्रसाद शर्माको प्रमुख आतिथ्यमा सहकारीमा आवद्ध १ सय २० जना कृषकलाई प्रतिलिटर एक रुपैयाँका दरले अनुदान रकम वितरण गरेको हो ।
प्रमुख अतिथि मेयर शर्माले सरकारले दिने प्रतिलिटर एक रुपैयाँ अनुदानले कृषकलाई केहि राहत हुने बताए ।
उनले आगामी दिनमा यस मुल्यलाई वृद्धि गर्दै लैजानुपर्ने र कृषकमुखी कार्यक्रमलाई नगरले पनि प्राथमिकता दिएको जानकारी दिए ।
पशुपन्क्षी तथा मत्स्य विकास निर्देशनालय, दिपायल डोटीले संस्थालाई आर्थिक वर्ष २०७७/०७८ को दुध खरिदमा दिएको प्रतिलिटर एक रुपैयाँ अनुदान दुध कृषकलाई वितरण गरेको संस्थाका व्यवस्थापक पुष्पराज ओझाले बताए ।
सहकारीका अध्यक्ष चक्रप्रसाद ओझाको सभाध्यक्षमा भएको कार्यक्रममा बिशिष्ट अतिथिमा पुनर्वास ८ का वडा अध्यक्ष राना श्रवण रहेका थिए । त्यस्तै अतिथिमा कार्यपालिका सदस्य बल बहादुर बिक र वडा सदस्य दिपेश मल्ल आसिन थिए ।
संस्थाकी उपाध्यक्ष गंगा केसीकाे स्वागत मन्तव्यसंगै सुरु भएको कार्यक्रमलाई सञ्चालन सहकारीका व्यवस्थापक पुष्पराज ओझाले गरेका थिए ।