धिराजनलाई चारै सुरक्षा निकायमा सफलता, प्रतिस्पर्धा गरेका पाँचै पदमा उत्तीर्ण; रोजाइमा प्रहरी इन्स्पेक्टर
त्यही सपना बोकेर निरन्तर मेहनत गरेका धिराजन परियारले एउटै वर्षमा सुरक्षा क्षेत्रका चार निकायका चार प्रतिस्पर्धात्मक पदमा सफलता हासिल गरेका छन्।
उनले नेपाल प्रहरीमा प्रहरी निरीक्षक, नेपाली सेनामा सहायक सेनानी, सशस्त्र प्रहरी बलमा प्रहरी निरीक्षक तथा राष्ट्रिय अनुसन्धान विभागमा अनुसन्धान अधिकृत र अनुसन्धान सहायक पदमा नाम निकालेका हुन्।
पछिल्लो पटक नेपाल प्रहरीको प्रहरी निरीक्षक पदमा सिफारिस क्रम संख्या ४ मा नाम निस्किएपछि भने उनले आफ्नो गन्तव्य तय गरेका छन्। अब धिराजन नेपाल प्रहरीको इन्स्पेक्टर बनेर देश र नागरिकको सेवा गर्ने तयारीमा छन्।
‘पैसा र पहुँच चाहिन्छ’ भन्ने सुनका थिए तर मेहनतलाई हतियार बनाए
२०५८ असोज १० गते बासगढीमा जन्मिएका धिराजन कुलबहादुर नेपाली र चन्द्रा परियारका दोस्रो सन्तान हुन्। एक दिदी र एक भाइका बीच हुर्किएका उनले सामान्य पारिवारिक अवस्थाबाट आफ्नो यात्रा सुरु गरे।
सानैदेखि उनले सुन्दै आए, ‘सुरक्षा निकायमा जागिर खान पैसा र पहुँच चाहिन्छ।’ तर उनले त्यो भनाइलाई आफ्नो सपना रोक्ने कारण बनाएनन्।
न पैसा खोजे, न पहुँच। उनले आफ्नो बल भनेकै मेहनतलाई बनाए। पोखरास्थित वन विज्ञान अध्ययन संस्थानबाट पूर्ण छात्रवृत्तिमा स्नातक तह पूरा गरेपछि उनले सुरक्षा सेवामा प्रवेश गर्ने लक्ष्य बनाए। त्यसपछि सुरु भयो निरन्तर तयारी र प्रतिस्पर्धाको यात्रा।
नेपाली सेना, सशस्त्र प्रहरी र राष्ट्रिय अनुसन्धानका परीक्षामा उनले पहिलो प्रयासमै लिखित परीक्षा उत्तीर्ण गरे। नेपाल प्रहरीको इन्स्पेक्टर बन्न भने पहिलो प्रयासमा सफल हुन सकेनन्।
तर असफलताले उनलाई रोक्न सकेन। दोस्रो प्रयासमा इन्स्पेक्टरको नाम निकालेर उनले आफूलाई प्रमाणित गरे।
पाँच पदमा सफलता, रोजाइ भने प्रहरी
धिराजनले यसै वर्ष हासिल गरेका सफलता आफैंमा उल्लेखनीय छन् । एकै वर्ष पाँचवटा प्रतिस्पर्धात्मक पदमा सफलता पाउनु उनको मेहनत, अनुशासन र तयारीको परिणाम हो।
तर यी सबै अवसरमध्ये उनको मनले रोजेको बाटो भने नेपाल प्रहरी हो।
अन्य सुरक्षा निकायका प्रक्रिया र अन्तरवार्तामा ढिलाइ भइरहदा नेपाल प्रहरीको इन्स्पेक्टर पदमा नियुक्तिका लागि सिफारिस भएपछि अब उनको सपना स्पष्ट छ, प्रहरी अधिकृतका रूपमा देश र नागरिकको सेवा गर्ने।
सामान्य गाउँको एउटा युवाले दिएको असामान्य सन्देश
धिराजनको कथा केवल सरकारी जागिरमा सफलता पाएको कथा होइन। यो त्यस्ता युवाका लागि जवाफ हो, जसले अवसरभन्दा पहिले आफ्नो परिस्थितिलाई हेरेर हार मान्छन्।
बर्दियाको सामान्य गाउँबाट सुरु भएको उनको यात्रा आज एउटा स्पष्ट सन्देश बनेको छ,स्रोत सीमित हुन सक्छ, तर सपना सीमित हुनुपर्दैन। पहिलो प्रयास असफल हुन सक्छ, तर यात्रा रोकिनु हुँदैन। पहुँच नहुन सक्छ, तर मेहनतको विकल्प हुँदैन।
धिराजनले देखाएका छन्—सफल हुन ठूलो ठाउँमा जन्मिनु पर्दैन, ठूलो सपना देखेर त्यसका लागि निरन्तर मेहनत गर्नुपर्छ।
आज उनी चार सुरक्षा निकायका पाँच पदमा सफलता हात पार्ने युवाका रूपमा चिनिएका छन्। भोलि उनी नेपाल प्रहरीको इन्स्पेक्टरका रूपमा देश र नागरिकको सुरक्षामा खटिनेछन्। बर्दियाको गाउँबाट सुरु भएको धिराजनको यात्रा अब राष्ट्रसेवाको बाटोमा अघि बढ्दैछ।
उनको सफलता धेरै युवाका लागि प्रेरणा बनोस्।
धिराजन परियारलाई हार्दिक बधाई तथा नेपाल प्रहरीमा सफल, इमानदार र गौरवपूर्ण कार्यकालको शुभकामना
