पुनर्वास नगरपालिकाबाटै ओझेलमा परे शहिद गोविन्द गौतम,माल्यार्पण कार्यक्रममा खादा ओढाएर सम्मान
पुनर्वास–वि.सं. २०७३ फागुन २६ गतेका दिन भारतीय ज्यादतीका विरुद्ध नेपाली भूमी रक्षार्थ प्राण आहुती दिएका शहिद गोविन्द गौतम ओझेलमा पर्न थालेका छन् ।
सोमबार परेको शहिद गौतमको आठौं स्मृतिमा कञ्चनपुरको पुनर्वास नगरपालिकाले राज्यबाट घोषित शहिदको शालिकमा माल्यार्पण भन्दै खादा लगाएर अपमान गरेको छ ।
पुनर्वासकै भूमी रक्षाका लागि भारतीय सीमा सुरक्षा बल (एसएसबी)को गोली लागि आफ्नो प्राण आहुती दिएका शहिद गोविन्द गौतमको परिवारले समेत शहिदको अपमान भएको बताएका छन् ।
नगरपालिका कार्यालयले बिशेष रुपमा मनाउनुपर्ने शहिद गौतमको स्मृति दिवसलाई खुसुक्क लुकेर कार्यक्रम गरेको प्रति शहिद परिवारले शहिदको अपमान हुनेगरी कार्यक्रम आयोजना गरेको बताएका हुन् ।
पुनर्वास नगरपालिका–४ का वडाध्यक्ष मनोज जैशीको अध्यक्षतामा आयोजना गरिएको आठौँ स्मृति दिवसमा पुनर्वास नगरपालिकाकी नगर उपप्रमुख भुलिया कुमारी रानाले शहिदको शालिकमा खादा लगाएर श्रद्धाञ्जली दिएकी हुन् ।
उनले आजको दिनलाई हामीले बृहत रुपमा मनाउनुपर्ने भएपनि उपस्थित निकै न्यून रहेको प्रति आफुलाई समेत दुःख लागेको बताईन ।
आगामी स्मृति दिवसहरुलाई विशेष रुपमा मनाई शहिद गौतमको सपना पूरा गर्नका लागि पालिकाले गर्नसक्ने विषयमा हामी अग्रसर रहने जानकारी दिईन ।
कार्यक्रममा पत्रकार केशव भट्टराईले घटनाको स्मरण गराउँदै पुनर्वास नगरपालिकाले शहिद गोविन्द गौतमको सपना पूरा गर्न नसकेको बताए । उनले पालिकाले गर्न मिल्ने भए शहिदको परिवारका लागि कोषको अवधारण गर्नसके अझै राम्रो हुने जानकारी दिए ।
त्यस्तै,पुनर्वास नगरपालिका–४ का वडाध्यक्ष मनोज जैशीले शहिद प्रति हार्दिक श्रद्धाञ्जली दिँदै नगरपालिकाले यस कार्यक्रममा चासो नदिएकोले सामान्य रुपमा मनाएपनि र आगामी कार्यक्रममा वडाबाटै ४०÷५० हजार बजेट विनियोजन गरी कार्यक्रम मनाउने योजना रहेको बताए ।
वडा सदस्य रेवती घिमिरेले सञ्चालन गरेको स्मृति सभामा स्थानीय समाजसेवी कासीराम बिष्टले स्वागत मन्तव्य दिएका थिए ।
कार्यक्रममा शहिदको शालिकमा खादा लगाएपछि शहिदका बुवालाई दोसल्ला ओढाएर सम्मान गरिएको थियो ।
सीमा नजिकै कल्वर्ट विवादमा सहादत प्राप्त गरेका शहिद गौतमकी तीन छोरीहरुको शिक्षाका लागि पुनर्वास नगरपालिकाले खर्च व्यहोर्दै आईरहेको छ ।
