सिन्धुलीको गोलन्जोर एकै परिवारका १६ जना परिवारका सदस्य बेपत्ता, पोखरामा भेटिए
एकै परिवारका १६ जना परिवारका सदस्य बेपत्ता भएपछि दिनभर स्थानीय जनप्रतिनिधिदेखि प्रहरी प्रशासनसम्म खोजी कार्यमा लागेको थियो ।
अन्तत: उनीहरू पोखरा महानगरपालिका–३० स्थित गगनगौंडामा भेटिएका हुन् ।
जिल्ला प्रहरी कार्यालय सिन्धुलीका अनुसार, उक्त परिवारले गत साउन १० गते राति १ बजे आफ्नो थातथलो छाडेका थिए ।
मधेश प्रदेश ०४-००१ ज ००८१ नम्बरको ईभी भ्यानमा खनियाँखर्क–सिन्धुली–हेटौंडा–मुग्लिन हुँदै पोखरा पुगेको जिल्ला प्रहरी प्रमुख लालध्वज सुवेदीले जानकारी दिए ।
‘ईभी चालक जीवनसँगको कुराकानीको अधारमा रातको १ बजे घरबाट निस्केको देखियो, अझै किन निस्के, किन घर छाडे भन्नेबारेमा प्रहरीले सोधपुछ गरेपछिमात्र थाहा हुन्छ,’ सुवेदीले भने ।
पोखरामा भेटिएका हायू परिवार भन्छन्- सिन्धुली फर्कन्नौं, धेरै बिरामी पर्यौं
ईभी चालक जीवनले पोखराको लेकसाईडमा रहेको जननी होटलमा लगेर छाडेका थिए । होटलबाट निस्किएका उनीहरू पोखराको गगनगौंडा भन्ने ठाउँमा पुगेका थिए ।
स्थानीय सोमनाथ पौडेल र चन्द्र भण्डारीको घरमा पुगेर उनीहरूले आफूहरू ज्यामी काम गर्न आएको भन्दै शरण लिएका थिए ।
उनीहरुलाई खोज्न जिल्ला प्रहरी कार्यालय सिन्धुली, जिल्ला प्रसासन कार्यालय र प्रहरी कार्यालय रामेछापको टोली परिचालित भएका थिए ।
सम्पर्कविहीन भएका उनीहरूको मोबाइलको अन्तिम लोकेशन रामेछापको सिमन्दीछाप भन्ने ठाउँमा देखिएको थियो ।
रामेछापका प्रमुख जिल्ला अधिकारी श्याम कृष्ण थापाको नेतृत्वमा रामेछापमा रहेका हायू समुदायको प्रत्येक घरमा प्रहरी पुगेको थियो ।
रामेछाप नगरपालिका ९ सेलेघाटदेखि रामेछाप बजारसम्म, हराएकी उर्मिलाको माईतीको घरमा समेत प्रहरी पुगेको थियो ।
सिन्धुली र रामेछाप लगायतका विभिन्न स्थानका प्रसासन, स्थानीय जनप्रतिनिधि लाग्दा पनि नभेटिएका उनीहरू पोखरामा भेटिएका थिए ।
