पुनर्वास नगरपालिकाको १७ औं नगरसभाबाट सम्मानित भए “लोगो” डिजाइनर विश्वकर्मा
पुनर्वास-कञ्चनपुरको पुनर्वास नगरपालिकाको कार्यालयले नगरपालिकाको “लोगो” डिजाइन गर्ने डिजाइनरलाई सम्मान गरेको छ।
मङ्गलबार सम्पन्न नगरपालिकाको १७ औं नगर सभाबाट लोगो डिजाइन गर्ने पुनर्वास नगरपालिका-६ स्थित साइरेक्स कम्प्युटरका सञ्चालक रमेश विश्वकर्मालाई नगद सहित सम्मान गरेको हो।
डिजाइनर बिकलाई नगरसभाका सभामुख तथा नगर प्रमुख तोयप्रसाद शर्माको बाहुलीबाट नगद २० हजार, दोसल्ला र सम्मान-पत्रले सम्मान गरिएको थियो ।
नगरपालिकाले डिजाइनर विश्वकर्माको कलाको उच्च सम्मान गर्दै आगामी दिनहरूमा पनि यस विद्यामा अझै अग्रणी स्थान पाइयोस् भन्दै शुभकामना समेत दिएको छ ।
नगरपालिकाको सम्मानपछि उहाँ फेसबुकमा लेख्नुहुन्छ,
“मेरो वर्कत र ल्याकतले भ्याएसम्म पुनर्वास नगरपालिका को लोगो बनाए, छनौट गर्नुहुने छनौट समिती र सम्पूर्ण कार्यपालिका सदस्यज्यूहरुलाइ धन्यवाद, लोगो निर्माणको क्रममा सल्लाह दिनुहुने सम्पूर्णमा हार्दिक आभार, बधाई तथा शुभकामना दिनुहुने सबैलाइ सादुभाव । जय पुनर्बास ”
डिजाइनर विश्वकर्मा सहित १२ जना डिजाइनरको आवेदन परेकोमा नगरपालिकाको भौगोलिक, धार्मिक, रीतिरिवाज र प्राकृतिक सम्पदा लगायतका क्षेत्रलाई समेटेर बनाएको लोगो भने डिजाइनर रमेश विश्वकर्माको मात्रै थियो।
