बेलडाँडी गाउँपालिकाको प्रमुख प्रशासकीय अधिकृतमा रामकृष्ण विश्वकर्मा
बेलडाँडी- कञ्चनपुरको बेलडाँडी गाउँपालिकाका प्रमुख प्रशासकीय अधिकृत वीरबहादुर ऐर सेवा निवृत्त भएपछि नयाँ प्रमुख प्रशासकीय अधिकृतले जिम्मेवारी सम्हालेका छन् ।
ऐर बिहीबार सेवा निवृत्त पछि स-सम्मान बाजागाजा सहित बिदाई भएपछि गाउँपालिकाको नयाँ प्रमुख प्रशासकीय अधिकृतका रुपमा रामकृष्ण विश्वकर्माले जिम्मेवारी सम्हालेका हुन् ।
संघीय मामिला तथा सामान्य प्रशासन मन्त्रालय सिंहदरबार बाट सरुवा भई आउनुभएका प्रमुख प्रशासकीय अधिकृत विश्वकर्मालाई गाउँपालिका अध्यक्ष, उपाध्यक्ष तथा अन्य जनप्रतिनिधि, कर्मचारीहरूले कार्यकालको शुभकामनासँगै स्वागत गरेका थिए।
बेलडाँडी गाउँपालिकाको कार्यभार सम्हाल्दै प्रमुख प्रशासकीय अधिकृत विश्वकर्माले आफ्नो भनाई राख्दै भन्नु भयो,- “गाउँपालिकाले संविधानले दिएको अधिकार प्रयोग गर्दै स्थानीय जनताको आकांक्षा र आवश्यकतालाई सम्बोधन गर्ने मूल जिम्मेवारी बोकेको छ। यस यात्रामा प्रशासन, जनप्रतिनिधि र नागरिकबीचको सहकार्य अपरिहार्य हुन्छ। त्यसैले म यो पदमा बसेर गाउँपालिकाका सम्पूर्ण नीतिगत निर्णय र जनप्रतिनिधिहरूको प्राथमिकतालाई कार्यान्वयन गर्दै, पारदर्शी, जवाफदेही र परिणाममुखी प्रशासनिक सेवा प्रवाह गर्न कटिबद्ध रहनेछु। जनप्रतिनिधि र कर्मचारी बीचको सहकार्य नै विकास र सुशासनको आधार हो। हामी सबै मिलेर सहकार्य गर्ने हो भने यस पलिकालाई अझै समृद्ध, सुशासित र आदर्श पालिका बनाउन सकिन्छ।
मैले यो जिम्मेवारीलाई अवसर मात्र नभई ठूलो दायित्वका रूपमा लिएको छु। हजुरहरूको साथ, विश्वास र सुझावले मात्र यस जिम्मेवारीलाई सफल बनाउन सकिन्छ भन्ने विश्वास म राख्छु।आगामी दिनहरुमा हजुर हरुको निरन्तर सल्लाह,सुझाव, मार्गदर्शन र सहकार्यको अपेक्षा गर्दछु”।
प्रमुख प्रशासकीय अधिकृत विश्वकर्मा लामो समय शिक्षण पेशा, स्थानीय तहको लेखा सहायक हुँदै हाल संघीय मामिला तथा सामान्य प्रशासन मन्त्रालय सिंहदरबार अन्तर्गत प्रशासन समुहका अधिकृत हुन् ।
